Pirsa jinan wek şîdet, tacîz û cudayetiya cinsî, pirseke civakî ye. Di serdema îro de, diviya di rewşa jinan de, di warê demokratî û wekheviyê de pêşkeftinên ber bi çav pêk hatiba.

Her çend di nav civata Kurd de şîdeta li dijî jinan, li gor berê kêm bûbe jî, lê hîn jî tund û tûjî li dijî jinan di nav civata Kurd de berdewam e û jin neheqiyek mezin dibînin. Hîn jî keç bê dilê xwe û bê îrada xwe mêr dikin. Hîn jî şîdetek mezin li dijî jinan tê bikaranîn, hîn jî keç bi hinceta ”namûs û şerefê” ji aliyê kesên nêzî xwe ve tên kuştin. Hîn jî gelek keçên Kurd mafên xwe yên tercîhê bo jiyana xwe tune ye. Hîn jî jin têra xwe di civatê de cîh negirtiye.

Zulm û tedaya li ser jinên Kurd, bi her awayî ducar û sêcar e. Jinên Kurd ne tenê ji ber jinbûna xwe, her wisa ji bo nasnama xwe ya netewî jî zulmê dibînin. Di şerê ku li dijî gelê Kurd tê kirin de, tedaya herî mezin jin dibîne. Ji ber ku hevjîna şoreşgeran e, dayikên şoreşgeran e, dayikên şehîdan e, derd, êş û eziyeta ku ew dikşînin kes nakşîne.

Jin, bi hemû êş û azarên xwe, bi xem û xeyalên xwe, bi dayikbûn, bi jinbûn, bi keç û xwîşkbûna xwe, bi bedenên xwe yên nazik û lawaz, lê bi dilên xwe yên mezin, bi îradeyên xwe yên xurt, dixwazin jiyanek bê şîdet û azad bijîn.

Konfederasyona Komeleyên Kurdistanê li Ewrûpa-KOMKAR.eu, tund û tûjiya li hember jinan mehkûm dike û ji bo jiyanek demokratîk, azad û wekhev têdikoşe. Bi munasebeta 8´ê Adarê, ji hemû jinên cîhanê ra û bi taybetî jî, ji jinên Kurd ra, jiyanek azad û bextewar dixwaze.

08.03.2012

KOMKAR.eu